Өсвөр насны хүүхдүүдийн согтууруулах ундаа хэрэглэж байгаа шалтгааныг хүйсээр нь авч үзье. Эмэгтэй хүүхдүүдийн 47.8 хувь нь эрэгтэй хүүхдүүдийн 38.8 хувь нь бусдыг дуурайж, хөвгүүдийн 41.9, охидуудын 42.3 хувь нь баяр ёслол тэмдэглэх гэж уудаг гэжээ. Мөн бухимдлаа тайлах гэж, эцэг эх гэр бүлийнхэнтэйгээ муудалцсанаас согтууруулах ундаа хэрэглэдэг гэжээ. Өсвөр насны хүүхэд архи согтууруулах ундааг хэрэглэж байна гэдэг гэмт хэргийн гаралт өсөхөд нөлөөлж байгаа гэдгийг ч албаны эх сурвалжууд мэдээлж байна. Нөгөө талаар өнөөдрийн нийгэм хүүхдүүдийн сэтгэлзүйд нөлөөлж, тэднийг амьдралыг өөдрөгөөр харах үзэлгүй болгож байгаа юм. Өөрөөр хэлбэл өсвөр үеийнхний дунд сэтгэхүйн ядуурал давамгайлах шинжтэй болжээ.
